市場熱線：金風勝在夠落後

尋日瓣瓣掂，就算近期有壞消息嘅水泥股同太陽能股亦照升，而下跌嘅股多數只係累積升得多有獲利回吐。

匯金豪氣內銀得益

尋日最勁係本地電訊股，取消無限上網plan其實已流傳好耐，卒之由數碼通（00315）率先發難，對平時用慣流動通訊睇戲煲劇嘅人嚟講係噩耗，但數碼通話只有15%嘅用戶用得多過2GB，但數碼通尋日就大升近14%。

放大圖片

放大圖片

一早已通天嘅《一號文件》尋日亦落實由農業科技做主角，同農業有關嘅股乘機炒起。其餘升得較多包括內險股、資源股、紙業股同濠賭股等，A股亦回升2%，匯金賣大包要少啲分紅，變相益咗錢莊股，A股其實比起港股同印度仍係大落後。

咁多板塊淨得金飾股最差，六福（00590）新春港澳地區的同店銷售增長得4%，公司亦好似有先見之明，過年前拿拿臨批股抽水。金飾股舊年也文也武，估唔到今年會跌得咁交關。不過，今年歐美印銀紙會令多啲人買金保值，所以唔好睇得咁死，可以趁低入貨。

淡友尋日多兩隻可沽空股份，分別係周大福（01929）及新華保險（01336），兩股股價表現有雲泥之別，前者逆市插3.9%，華保卻勁升8.5%，升幅冠絕幾隻內地保險股。古勝聽聞借貨行開出條件都幾辣，前日兩隻股票借貨叫價都要年息6厘樓上，但周大福仲係奇貨可居，早早借罄，事緣近日不少大孖沙睇淡內地奢侈品消費市場，沽空股數1,946萬股，佔全日成交36%，比華保的2.5%高一截，可見大戶睇法。

華保有消息配合先避過糟質，包括一月保費增長數字優於全行，另外，昨公布準備發債150億元人民幣，分析員估計償付能力將大大改善，最後一點係幾隻保險股中，因策略股東結構影響，華保向來較A股折讓較大，消息話近日有內地基金睇中，保守一點，折讓如收窄至一成，不能排除今浪見34至35元。

專吼舊年跌到五勞七傷嘅「衰股」隨時發達，鐵路股同航運股係最佳例子，風電股亦蠢蠢欲動，中傳動（00658）尋日升7.5%，但收市後發盈警，話客戶延遲定單同利息支出大增，所以會盈利顯著減少。公司舊年上半年已賺少近5成，但營業額仍輕微上升，依家全年收入將會倒退，證明下半年幾慘情。

另一風電設備股金風科技（02208）情況都唔好得幾多，舊年頭三季賺少近6成，而營業額亦減少13.5%。但樂觀啲睇，其實盈警已係預咗，華能（00902）同中海發展（01138）咪一樣發完盈警之後一路上升！依家孖屐已經唔係睇業務同前景，只係睇有幾落後同有冇得炒。

開拓海外風電市場

風電設備股可謂同病相憐，「一哥」華銳（A股）日前亦發盈警，話舊年賺少5成以上，其中最主要原因係市場競爭激烈，令產品價格同毛利率齊跌，好多細廠已頂唔順執笠。

另外，風電客戶定單延遲亦係原因之一，舊年祖國風電發電量未能達標，華銳連續3年喺風電新增機組排第一，達370萬千瓦，但金風以360萬千瓦只輸個馬鼻，而金風見內地風電發展放緩，所以響應「走出去」政策，喺美洲共有14個項目。金風唔似中傳動咁周身債，勝在財務健康，睇走勢係大落後，近日圓底上升，扒逆水買「績憂股」，隨時盲拳打死老師傅。