上市公司除咗盈利能力外，更重要係企業管治嘅能力，近年內地企業都識得企業管治會影響對其基金及機構投資者嘅吸引力。中電信（00728）就連續第三年獲財經雜誌《Euromoney》評為「亞洲最佳管理公司」嘅首位，管理層更向基金及分析員廣贈，有心思嘅答謝卡同充電器，寓意獲獎係有賴投資者嘅「給力」支持。
《Euromoney》嘅「亞洲最佳管理公司」獎項，係由基金經理、投行、分析員及研究機構參與評選。喺評核企業管治水平嚟講，一向被認為係具分量嘅獎項。
據中電信嘅友好話，決定用充電器概念設計感謝卡，係受到「給力」呢個內地潮語啟發，寓意公司管治水平嘅提升，係有賴投資者嘅支持作為動力。與此同時，作為紀念品嘅充電器，又正好印證咗智能手機同移動互聯網普及嘅趨勢，正好反映中電信近年喺發展策略上嘅執行能力，絲絲見到呢份禮物，都要畀十個like。
余絲韻