今個農曆新年勁凍，對內地房地產商嚟講，就真係凍足一年。絲絲嘅老友話一一年內地樓市喺可以號稱為「史上最嚴」嘅宏觀調控下終於度過。唔少內房開發商都準備好，繼續面對今年內地樓市「寒流」。佳兆業（01638）副主席譚禮寧（L.L.）都話，一眾管理層都知依家環境艱難，所以「講心唔講金」，主動提出今年唔收花紅，實行同公司共度時艱。
雖然話有調控打擊，但係佳兆業舊年成功喺下半年發力，喺主席郭英成嘅帶領下，賣樓賣到超出全年目標完成，金額做到152億人仔。做得咁好，一眾管理層又咁乖，所以據講老細都好識做，對個別管理層都有「錫」番一啖，以示獎勵，至於點「錫」呢，就唔講得畀絲絲知喎！
員工加薪難及去年
除咗管理層之外，L.L.話其他公司員工都有得收花紅嘅，仲相信佢哋會相當滿意添，至於今年人工嘅加幅有幾多？佢話要根據表現嚟定，不過整體嘅平均加幅就無之前一年咁好，具體幾多佢就無講畀絲絲知喇。唔緊要喇，最緊要今年賣樓再做到好成績，管理層一定會回報員工嘅！
余絲韻