市場熱線：大唐有條件踢上

古勝話個市調整吓反而更健康，但A股真係令人相當失望，係咁意開完紅盤之後又再跌，藉口係過年期間冇減到存備率，減遲啲都咁緊張？A股話過完年首個交易日預示全年升跌命中率達八成，豈非龍年亦打定輸數？內銀同內房A股拖冧大市，香港亦係呢兩類股成重災區，30隻錢莊同保險股無一幸免，A股連資源股都先升後跌，淨得再發生事故嘅紫金A股有得升。A股一場歡喜一場空，保險股、A50中國（02823）同中信証券（06030）中空寶，所以跌得最甘。

歐盟峰會再無驚喜

特首喺瑞士突然話「好驚」，其實歐債衰咗兩年乜都驚完，依家反而係恢復信心嘅時候，開完世界經濟論壇，又到歐盟峰會尋日開檔；舊年歐盟開親會，金魚缸都會有無限憧憬乘機反彈，但今次可謂無「驚」無「喜」。

內房股尋日慘跌，原因係春節期間賣樓拍烏蠅，曾經傳聞北京零成交，後來證實係美麗的誤會，但其他大城市亦得十幾單成交；反而香港多得老美話三年內唔加息，令到成交回升。雖然祖國新春樓市唔發，但據聞零售同旅遊表現唔錯。香港好似人山人海，但計增長速度係逐個月放緩，今年仲要捱貴租。六福（00590）話同店銷售增長得單位數字，賴天氣又濕又凍，而英錶（00887）尋日更大跌7.5%。

藍籌股得7隻上升，3隻公用股已連升兩日，QQ（00700）掹facebook上市車邊保持強勢；中電信（00728）爭「哎瘋」客，聯通（00762）遇對手，股價大跌5.2%，而煤炭、水泥同金屬股亦跌到七彩。

中石化（00386）同華能（00902）尋日創52周新高，但前者只係平收，華能則收市仍升4.5%，收市後發盈警話舊年賺少一半，但頭九個月已賺少55%，所以係預期之內。香港電力股就話係避險投資，內地電力股一向唔興呢家，反而因為祖國電力主要係工業用途，經濟好自然電力股好。

煤價回落有助經營

當然，電力股並非亂炒，兩個月前加電費，加埋阿爺限制煤炭價格，令成個行業都生態改觀。另外，唔使阿爺限價，電煤價格已經連跌10個禮拜，連冬天旺季都咁慘情，所以有推測煤炭價格上半年會回落到每噸700蚊人仔，原因係產能增長同進口增加，相反對電力股係好消息。

電力股舊年尾一早炒定加電費消息，但消息落實後反而見趁好消息出貨，整固完之後又再上過，華能亦係表現最好嗰隻，但高追無謂，古勝反而揀落後股更啱胃口，大唐發電（00991）仍較52周高位低17.6%，一○年PE唔夠10倍，一一年成績倒退，預測PE回升到約14倍，但今年環境大幅改善，PE有望回復單位數，博煤價繼續回落，大唐亦有機會步華能後塵創52周新高。

古勝