孖妹缸湖遊：基金經理FUND享攻略

陳：天利投資基金經理陳暟滋

中國印尼可睇高一線

祺祺： 舊年港股好「chok」，依家諗番起都仲猶有餘悸！唉，我依家手上仲有唔少蟹貨，究竟今年個市會唔會升返上嚟架？

　陳： 放心喎，今年個市會好啲啦！港股現於低位徘徊，估值相對便宜，加上股價已反映出市場上嘅不利因素，可算係入市時機呢！儘管全球經濟展望仍未穩定，令到股市反覆上落，但長遠嚟講有增長空間，可逐步增持具升值潛力嘅股票。不過，由於個市的確反反覆覆，投資者好容易被外圍因素帶動，所以我哋投資之前一定要做好功課，了解企業嘅財務狀況，先至唔會被「chok」親。今年嚟講，亞洲市場嘅經濟表現將較歐美等地優勝，當中以中國及印尼嘅前景較為明朗。

祺祺： 即係我哋今年可投資亞洲股市啦！

　陳： 亞洲經濟增長會喺今年進一步放緩但回穩，而中國經濟增長將可「保八」，內需同基建續成內地增長嘅動力，特別係消費市場嘅發展前景。我經常返內地開會，留意到內地嘅商場愈開愈多，可見內地人嘅消費意欲有增無減，相當旺盛！

祺祺： 我喺香港都feel到呀，內地旅客經常嚟港購物o架啦。誇張啲講句，香港啲商戶淨係做內地遊客都唔使憂！

　陳： 無他嘅，中國人嘅薪酬愈益增加嘛，消費能力咪大大提高囉，亦因此造就了消費股嘅升值潛力，既唔受外圍經濟影響，又唔會受到中央調控經濟政策所打壓，所以前景理想。

除咗消費股外，我今年仲會留意內房股同內銀股嘅表現，雖然市場上對內房及內銀仍有憂慮，內房仍有供求失衡嘅問題，而內銀亦有地方債嘅隱憂，但其估值已跌到一個相當吸引嘅水平，故可考慮逐步增持內房股同內銀股呢。

資金流入 價啱即入貨

祺祺： 股票場上經常都以大戶玩家馬首是瞻，你管理逾五億美元資金，你今年會喺咩時候入市買股架？好等我哋知道入市時機嘛。

　陳： 哈哈，我並無選定時間去入市架。當有資金流入，而股票又處於合理價位時，我就會增持股票。換句話講，我唔會持有太多現金，因為客戶付出管理費，都係希望我哋可以作出適當投資以賺取回報，所以我會把資金投放在股票上。

林：易方達資產管理董事總經理兼投資經理林永森

周期性行業料先回升

高妹： 今年個市好似好難估咁，市場消息時好時壞，我哋真係唔知點買貨呢！

　林： 無辦法啦，舊年個市自美國信貸評級被下調後，便觸發起股場上嘅拋售潮。及至年尾，歐盟成員國終有共識，加上中國通脹問題得以紓緩，港股才重拾升勢。不過，港股嘅估值已跌至低水平，另中國經濟增長回穩亦可進一步利好港股表現，所以今年恒指成績會轉好，預計全年會有超過10%嘅升幅。

高妹： 聽你咁講，我哋啲蟹貨好似有番啲「返家鄉」嘅希望，咁你係咪會增持股票呀？

　林：雖然我睇好今年港股表現，但恒指係咪見底仍然係未知之數，因市場仲有好多不明朗因素，所以唔少投資者都持觀望態度，而我都會等多一兩個月，睇吓中國喺三月嘅兩會會議過後，會唔會有經濟政策推出利好大市表現，所以我會先靜而後動。

高妹：恒指喺今個月升返到二萬點，我本來有追貨念頭，但聽你講完之後，諗諗吓都係「一動不如一靜」，睇定啲個市先至再出手！

　林： 話雖如此，但中國經濟因素確實不俗，所以A股定能重拾升勢。中國經濟增長將續倚靠基建投資同內地消費。喺未來一年，我認為消費市場嘅增長潛力較好，因消費係個體行為，並唔係基建投資需要借貸，以致出現地方債務問題。因此，中央可多投放資源喺老百姓身上，對窮人作出收入分配，增加人民收入，嚟刺激消費市場。另外，若然經濟好轉，商品股同航運股等周期性行業會率先受惠，其股票升值潛力將會不俗，所以我今年會提前留意周期性行業。

高妹： 不過A股市場喺舊年跌得好慘喎，今年係咪可以好轉呀？

　林： 中國A股喺舊年的確跌得好殘，但今年唔使擔心，A股喺今年嘅表現會好過舊年。中央會放寬宏觀調控政策，加上內地嘅通脹壓力得以受控，都可以利好A股今年表現架。

高妹： 唔，睇嚟A股係今年金融市場嘅火車頭喎，咁我哋仲有啲咩要注意呀？

　林： 環球金融市場自經歷歐美債務危機一役後，陰霾仍揮之不去，市場擔心歐美債務問題會再爆多一鑊，有礙環球經濟復甦。喺咁多不明朗因素籠罩下，今年個市的確難以捉摸呀！

一月份你的股票投資成績如何？

踏入二○一二年，港股有個好開始，恒指由去年底收市18,434點，已輾轉升約一成挑戰20,500點。一月份你的股票投資成績如何？據今期《東方產經》網上民調，截至上周末晚上六時的結果顯示，17.4%表示「賺兩成以上」，32.6%表示「賺一成至兩成」，6.5%表示「賺一成以下」，10.9%表示「打和或未入市」，32.6%表示「暫錄虧損」。

林永森小檔案

現職：易方達資產管理董事總經理兼投資經理

管理資產：逾1,700萬美元

投資經驗：18年

學歷：廣州外國語學院國際貿易系學士、暨南大學經濟學碩士

陳暟滋小檔案

現職：天利投資基金經理

管理資產：逾5億美元

投資經驗：11年

學歷：牛津大學政治、哲學和經濟學學士

若有料報畀高妹同祺祺或有嘢問，可電郵money.biz@opg.com.hk

高妹、祺祺