市場熱線：中信泰富估值提升

港股抖吓氣再上

不過，坊間開始覺得港股升咗咁多，係時候要抖吓氣，上周五升市令人奇怪係公用股突然回升，連粵投（00270）亦升3.36%，防守性股份抬頭可能預示個市見頂。其實，做吓調整對個市更健康，依家恒指終極阻力係二萬一至250日線之間，要儲夠火先可以再上。

歐洲撲朔迷離，希臘成日話就快同債主傾掂數，結果又拖到今個禮拜，傳聞葡萄牙又想講數。惠譽降低5隻豬評級，但降級已冇乜好驚，意粉國上個禮拜賣110億歐元國債又相當搶手，歐元上到1.32水平，5,000億歐元長期再融資操作（LTRO）起碼可以玩多兩季。

港股欲罷不能，上周五恒指朝早一度倒跌55點，但收市仍然升62點，出口股如招商局（00144）、利豐（00494）同思捷（00330）最威，電訊股同電訊設備股翻生，但食品股繼續捱沽，係人都知捉啱主題就發達，有經驗嘅識睇趨勢，寧搭順風車切勿包拗頸。

內房股有回吐，阿爺搞新意思，將40個城市聯網防止跨市炒樓，其實同胞有錢都攞去炒股好過，買內房股亦好過買樓。所謂價值迷思，樓價今年無望回升，但內房股跌到咁殘，計資產值變相抵買。

同樣情況發生喺航運股，前排炒PB折讓不亦樂乎，但「菠蘿」指數（BDI）已跌到700幾點，同舊年底1,800點比較跌到得零頭都冇，雖然話農曆新年例牌偏淡，但BDI跌到三年新低，仲衰過雷曼爆煲嗰時，航運股今年可能要繼續見紅，PB低都補唔番，上周五集體跳水，暫時無謂掂。

受惠金屬價格漲

老美話長超低息直至一四年尾，QE3亦等住推出，美匯指數跌到落78.85，金屬價格均見回升，除咗吼金屬股之外，中信泰富（00267）亦可以一諗，公司持有澳元、鐵礦石同特鋼資產，衰在澳洲鐵礦石項目要延遲半年投產，仲要向中冶（01618）畀多64億工程支出，但消息經已反映喺股價度，中信泰富上周五股價三個幾月來首次一度升破15蚊，但仍算係落後股。

就算今年鐵礦石產能遠低過預期，中信仍係低估值嘅股票，一一年PE得5倍幾，扣番投資物業公平值變動，核心盈利PE仍係偏低，而鐵礦石明年產量可升至1,200萬噸，雖然話鐵礦石同特鋼業務要睇住祖國經濟狀況，但資產折讓有30%，而收租、發電、隧道、大昌行（01828）同中信電訊（01883）都可提供穩定收益來源，現價風險算低，短線有機會破位而上，中長線則待鐵礦石項目投產後，估值有機會提升。