唔少大型金融機構開始向高層發放花紅，答謝佢哋過去一年嘅功勞。但今時唔同往日，自從金融海嘯之後，金融業寒冬未過，大行派幾多花紅隨時畀政府管住。
好似畀英國政府國有化嘅蘇格蘭皇家銀行（RBS），佢哋個行政總裁赫斯特，啱啱喺責罵聲中袋走咗接近100萬英鎊花紅，搞到班英國高官繼續鬧，想佢嘔番啲花紅出嚟咁滯！
未出花紅之前，英揆卡梅倫已經嘈嘈閉，講明唔准赫斯特袋走多過100萬英鎊花紅，結果赫斯特咗價值96.3萬英鎊（約1,174萬港元）嘅公司股份，比起一○年花紅少咗一半有多，而且要到後年至攞得，蘇皇話呢筆錢係回饋首領替該行扭轉頹勢喎。
英國高官依然係眼火爆，連珠炮發咁話蘇皇寧願炒人都要留咁大份錢畀首領，以122萬英鎊底薪嚟講，近百萬花紅實在太多，又話蘇皇被國有化後，赫斯特應該當公僕看待，當日無納稅人啲錢撐住間行，蘇皇一早執咗。在野工黨亦乘機狂插執政黨管制大行高層薪酬不力，罔顧選民感受云云。
反觀同樣畀政府國有化近半嘅萊斯銀行，阿頭奧爾塔─奧索里奧講咗唔會拿上年花紅，皆因佢淨係底薪都有239萬英鎊，相當夠使。
另邊廂，消息話瑞信減咗資深投資「賓卡」上年嘅花紅平均30%，亞洲區嘅賓卡亦難逃一「削」，幅度約兩成。