智能手機普及化，究竟係令大家關係密切咗，定係疏離咗？好似喺新正頭，以前就算唔得閒上門拜年，都會打個電話，之後就發展到SMS拜年，依家改用WhatsApp、Line，難怪電訊管理局嘅統計顯示，在啱啱嘅年初一，本港嘅SMS接收及發出數量較之前一年急跌11.68%同16.29%！
雖然用量下跌，計計條數，今年過年本港收發嘅SMS數目，仍有3,315萬及2,451萬條，不過香港喺大時大節SMS使用量下跌嘅情況，已經持續咗一段時間。
喺舊年嘅情人節，本港嘅SMS收發量，已扭轉過去多年嘅增長勢頭，而喺舊年嘅聖誕節同元旦，SMS嘅收發量一樣係有跌無升。
事實上，SMS被WhatsApp等即時通訊Apps代替已經係大勢所趨，電訊界將此稱為「SMS Erosion」。唔少分析都認為，電訊公司要靠SMS開拓財源嘅如意算盤，已經再難打響喇！