絲絲講場：張智媛六月走人 會公CEO爭崩頭
會計師公會行政總裁張智媛，舊年中話唔會再續約，鐵定喺今年六月約滿離任。會計師公會招聘下任CEO嘅工作原來早已開始，絲絲聽聞，有唔少人對呢個位都「虎視眈眈」，當中不乏大家認識嘅名字，預料會有一番「惡鬥」。
咁又係，聽聞呢個位年薪有番咁上下，加上會計師喺專業人士界別有好大影響力，會計師公會CEO個位責任重大，自然吸引唔少精英分子有興趣角逐。
會計師公會早排已經開始進行公開招聘，積極搵人，同一般半官方或公營機構一樣，會計師公會將成立遴選委員會挑選合適人才。絲絲聽聞，公會都想快啲搵到繼任人，以便CEO工作順利交接及過渡。
其實會計師公會CEO呢個位挑戰性都好大，尤其係政府依家建議加強審計獨立監管，研究係咪需要擴大財匯局權力，會計師公會早前已「自動波」，同意將審核會計師行嘅責任交出，但公會希望保留紀律處分同註冊會計師嘅權力。
改革多多 份工挑戰大
另外，講咗好多年嘅會計專業責任制度，仍然未有實際進展；而部分改革派早前又話要改革公會嘅會長選舉制度，要一人一票選出會長，未來CEO都可謂大把挑戰，有排忙喇。
余詩韻