新年之後又要奮進！新一年股場新氣象，又係時候發掘有潛質嘅股份！依家市況波動，揀選股份當然係大藍籌會較好，大家話係咪？不過，即使係大藍籌，如果業務唔得分散，風險仍然高。你諗吓，好似金融股咁，獨專一瓣，到有起事上嚟，真係避無可避！
和黃（00013）主要有五項業務：港口服務、地產酒店、零售、能源基建、財務投資、電訊等等。集團嘅港口吞吐量近排以約10%嘅速度每年增加，加埋不斷實施嘅營運監控，鎖緊利潤。呢兩年，集團嘅地產酒店業務賺到盆滿缽滿，主要受惠於個人遊同埋地產價格上升。
講番和黃3G業務，呢幾年集團仍不斷發展，但已比早年搶佔市場時落嘅火藥少。近排市場就傳和黃計劃用14億歐元買「奧地利橙」，將3業務繼續全球化。不過，呢次收購已經藥力輕好多，槓桿比率只輕微上升至31%。由此可見，和黃嘅3G業務已進入收成期，唔會再對和黃嘅槓桿比例構成重大負累影響，呢點亦可以喺公司近幾年嘅股價度見到！隨住公司成功調校商業模式，依家和黃唔使再趕急退出3G市場，慢慢物色好買主又或繼續經營，變現利潤。至於和黃會唔會賣3G業務，就要睇有冇重金買主喇！
隨住和黃3集團嘅發展，客戶總人數持續上升，幾年前搶佔市場嘅效用開始發揮出嚟，變成生金蛋嘅雞！繼續追蹤、出發！
香港大學電子金融服務榮譽助理教授 徐燦傑