絲絲近日睇新聞話俄羅斯有個「冰雕城」，好想去見識吓。講開俄羅斯，首家登陸港股嘅俄企──俄鋁（00486），已踏入上市兩周年；為咗慶祝上市周年紀念，俄鋁諗住搞個「潮拍俄羅斯」嘅攝影比賽，繼續佢哋推動中俄文化交流嘅長遠計劃。
其實俄鋁一直都為兩地文化交流「出錢又出力」，繼二○一一年嘅「愛‧俄羅斯」文化活動，以及「香港‧俄羅斯：平凡英雄」電視特輯後，今次就諗住鼓勵港人，透過港人喜愛「周圍拍」嘅心態，發掘日常生活中未為人注意嘅俄羅斯文化同元素。
個比賽會喺下個月正式完結，參賽者要將參賽照片電郵畀俄鋁公司，並寫上最多15個字嘅中文或英文簡介。想知多啲詳情嘅讀者，可以去俄鋁喺面書（facebook）嘅「Friends of Russia」專頁瀏覽。
據知，公開組嘅冠、亞軍，將分別獲得俄羅斯及西伯利亞貝加爾湖嘅機票連酒店雙人套票。
嘩！絲絲聽完都即刻躍躍欲試呀，但唔知如果影張「俄羅斯方塊」嘅圖片，獲獎嘅機會有幾高呢？