絲絲講場：港交所金牛利是 出市員連中雙寶
尋日係龍年第一個港股交易日，港交所（00388）一如以往咁搞咗個開市儀式，但就有兩樣嘢係新嘅，包括喺交易大堂敲鑼，同埋派利是時玩「驚喜」派千元大利是，其中一名出市員真係行運行到腳趾尾，連環攞到港交所主席夏佳理及行政總裁李小加嘅千元大利是。
夏佳理李小加做財神
李小加同夏佳理敲完個鑼之後，化身做埋財神，周圍派利是畀啲出市代表。絲絲過年前，已率先爆料，話港交所今年封利是會「加碼」，由每封二十蚊加到五十蚊，主席就好風趣咁話，通脹咁犀利，其實多咗30蚊都未必夠大家買多杯咖啡或者食多籠點心，所以希望廣大僱主幫幫手，加吓啲伙記人工，等佢哋生活好過啲喎！唔單只利是「加碼」，每20封之中，就有一封係「特別版」，「個餡」係一千銀。
絲絲都好想攞呀！有人報喜，話有一個出市代表唔止抽到一千蚊利是咁簡單，而係喺李小加同夏佳理手上各抽到一封，即係夾埋抽咗二千銀走，呢個新正頭對佢嚟講就真係行大運嘞。有經紀仲提議話，不如下年唔好淨係得兩款銀碼，整多幾款唔同銀碼嘅利是畀大家抽，咁就仲好玩啦！
余詩韻