龍年首個交易日，港股紅盤高開高收，恒指最後收報20,439點，升328點，成交609億元。畢竟美國話維持低息至一四年或以後係大方向，短線實質利好有限，再加上技術上恒指喺20,500至20,800點水平阻力甚大，再追入超買股份風險不容忽視。
中資金融股繼續領跑，轉移視線至落後股，昨見風電股、本地地產股同商品股都有唔錯表現，昨日有圖有勢提及嘅中鋁（02600）突破4元關，收報4.12元，升3.2%。
此外，專做柴油機及汽車零部件等嘅濰柴動力（02338）亦有睇頭，見大行買盤掃到甩轆，曾高見42.95元，收報42.65元，升6.49%，大陽燭成功突破長期下降軌阻力，若短線回吐守穩40元樓上，可反覆向45至46元阻力位推進，10日線支持在39元。
古晨