市場熱線：中海油重拾強勢

踏入龍年風水輪流轉，地主股接力升開有癮，但舊年最威嘅康師傅（00322）、旺旺（00151）同恒安（01044）就因大戶轉換組合而捱沽，而尋日最勁係金礦股、濠賭股、二線內房同水泥龍頭，但窩輪同牛熊證佔大市成交縮到得15%左右，當大、細價股都有得炒嘅時候，唔使幫襯「賭場」。

大選年聯儲局識做

花旗國逢親大選年例牌放水喉刺激經濟，但家陣息口減無可減，惟有將超低息環境拖到一四年尾，差唔多3年期嘅支票真係任佢點噏，但出口術呢招萬試萬靈，美股隔晚即轉跌為升；奧巴馬連任對阿伯亦有好處（共和黨執政隨時被炒），所以貨幣政策會盡量配合。

新春市道依然暢旺，「6,000蚊效應」兼16年最凍農曆新年，食肆同賣衫笑逐顏開，而個人遊繼續攻陷廣東道同金舖，周大福（01929）亦重上招股價。三月開始玩埋「自駕遊」，金飾鐘錶股會受惠，但古勝祝大家股運亨通之餘，亦要祝埋出入平安、和氣生財。

「衰股」翻生可能只差一個契機，好似李寧（02331）批完舊股再發CB，即刻脫胎換骨，仲帶起埋特步（01368）等其他波鞋股。買李寧其實係買TPG，皆因TPG曾將達芙妮（00210）省靚招牌，達芙妮尋日股價亦創咗上市後新高。至於李寧舊年成績表擺明差到無倫，如果TPG一、兩年內亦可以將李寧起死回生嘅話，古勝不得不寫個「服」字！

呢個浪由萬八起步，累升已接近2,500點，有專家已講緊「股災」─無股之災，古勝反而奉勸各位唔好博咁盡，「相反理論」準過班玄學家多多聲。依家孖屐紛紛放棄防守股，追求更高回報，裕元（00551）尋日大跌7.2%係明顯例子。中興（00763）亦跌5.3%，雖然同愛立信和解但要畀專利費，唔知係逐部機計定一次過畀，市場最憎係不明朗因素，因為分析員暫時唔知點同佢計數。

負面因素已作反映

中海油（00883）前排亦受漏油事故困擾，佢阿媽卒之宣布同康菲一齊賠10億人仔畀漁戶，10億人仔唔算小數目，但比起中海油市值同盈利只係濕濕碎，而且上市公司可能只需孭小部分。達成和解意味蓬萊油田可望盡早復產，對今年盈利屬利多於弊。

中海油過年前公布今年發展大計，淨產量竟然同舊年差唔多，股價當堂受壓，亦明顯跑輸畀中石油（00857）同中石化（00386），但孖屐近排興輪流炒，中海油嘅負面因素經已反映，何況今年產量比預期少啫，未來幾年陸續有新項目落成之後可以補番數。

國際油價喺100美元附近上上落落，市場氣氛轉好有利油價，而祖國油股受惠於暴利稅降低，而天然氣價格亦有望逐步同國際接軌，中海油預測PE只係8倍，16蚊附近好似幾大阻力，但衝破之後可博升多一成。

古勝