自從台灣馬英九成功連任總統之後，大家喺度諗內閣可能要大執位。手揸兩岸經貿政策大旗嘅經濟部長施顏祥，都畀記者追問係咪會留低。佢話經濟部長嘅工作繁重，自己同前幾任部長都變成「冇膽」之人嘞！
嘩！雖然Guts唔係個個人都有，但都唔使妄自菲薄啫。聽真啲，原來喺呢20年嚟，經濟部先後有多名部長，由江丙坤、林義夫到佢自己，都已經將膽囊切咗，所以個個都冇咗個「膽」。
關於內閣改組，施顏祥話自己好「隨緣」，但改組前會認真做，好似兩岸嘅業務，依家仲有好多嘢要做。講講吓，佢忍唔住話工作量好大。當然，唔係個個部長都係冇膽匪類，佢都提到「前任」陳瑞隆嘅身體就保養得唔錯。
幾個月之前，施顏祥就因為休息唔夠，喺個頒獎禮致辭後，突然覺得頭暈企唔穩，當時閣揆吳敦義即刻衝上台扶佢落樓梯。所以話，幾時都要注意健康呀！
