打工仔最想有份筍工，《財富》雜誌中文版就幫大家揀咗一批，大家不妨參詳吓。呢個叫做「美國100間最適宜工作嘅公司」選舉，排頭位係Google，佢舊年排第四名。
至於第二名仍然係波士頓諮詢集團，舊年排榜首嘅SAS Institute就跌落季軍。喺100家上榜公司入面，IT界佔最多，有17家，其後係金融保險業界。
Google成為美國打工仔眼中嘅筍工，因為公司喺舊年仍然大舉招聘人才，新增咗7,020個崗位，喺上榜嘅公司入面增長嘅幅度係最大，加上公司出晒名厚待員工嘅文化同貼心福利，又點會唔令打工仔心郁喎！
排行榜仲提到，排喺第73位嘅星巴克喺舊年就收到760萬封求職信，係所有入榜公司中最多嘅一間。至於跌咗落第三位嘅SAS，雖然無咗個冠軍寶座，不過就成為員工流失率最低嘅公司之一，舊年只有2.22%員工主動離職。
有趣嘅係，排名76位嘅微軟唔單止比舊年下跌四名，全年共有2,364名員工離職，成為員工流失最嚴重嘅上榜公司，不過公司舊年都收到50幾萬份求職申請。