兔年即將過去，估唔到肖兔嘅吉利汽車（00175）主席李書福都行個「兔尾運」，公司股價無端端因為一單舊聞炒起10%，市值多咗成16億元。
按魚缸中人嘅說法，除咗因為有家歐資行早幾日將吉汽列入「利是股」推介之列，更多人炒作嘅消息，就係吉汽嘅「帝豪EC7」房車喺歐洲新車安全評價組織（EuroNCAP）嘅撞擊測試中，成為首款獲四星安全等級嘅中國國產品牌汽車，為呢款車拓展歐洲市場打下重要基礎。
內地品牌汽車過去喺歐洲市場經常被冠以「唔襟撞欠安全」嘅惡名，吉汽股價借消息炒上本來無乜特別，但奇就奇在「帝豪EC7」今次獲EuroNCAP四星安全評價嘅消息，早喺上個月中開始，已經廣為汽車行業所流傳。吉汽當時更講到明，將會喺意大利聘任代理，以呢款車開展西歐市場出口嘅計劃。舊聞翻炒亦能夠令股價急升，難道真係行運行到兔尾巴！
另一個肖兔行運嘅人，就係李寧（02331）主席李寧，雖然出咗盈警，但搵到猛料基金注資，股價即刻生猛晒，升8%。
余絲韻