終於嚟到兔年最後一個交易日，詩詩先祝各位龍年行大運，炒股得心應手。
講到過年，近年股場逢年頭都有一個指定動作，就係炒中央「一號文件」，據聞今年嘅「一號文件」短期內就會發布，內容方面，今年又再回到農業上，仲會重點講農業機械化，明顯對第一拖拉機（00038）有利。
除咗炒政策之外，一拖早前亦獲通過發行A股計劃，雖然舊年幾隻回歸A股嘅股份，都唔見因此而有太突出嘅表現，但此一時彼一時，隨着近日A股氣氛有所改善，到正式掛牌之時，應能成為拉動H股股價的催化劑。
一拖股價近兩個月一直未能走出6.5至8元之間的大型上落區，走勢落後大市，相信與其去年中期業績欠佳，純利只微升1.6%，至2.71億元人民幣，毛利率更跌至12.8%有關，但在利好政策支持下，下半年度業績應可顯著改善。昨日股價逆市微跌，收7.59元，建議現水平收集，一旦升破去年十一月高位8.15元，後市將海闊天空，支持位7元。