絲絲講場：花旗港大課程集300年經驗
大家聽到坊間課程介紹自己歷史悠久、經驗豐富，可能最多都係三、四十年經驗，但如果講到三百年經驗，相信都幾震撼。絲絲講緊嘅係花旗銀行同香港大學合作舉辦嘅銀行業課程，花旗集團香港區行長章晟曼話，適逢今年花旗二百周年，加埋港大逾百年歷史，足足有三百年經驗，所以佢哋合辦嘅課程質素絕對有保證。
兩個雖然加埋成三百年歷史，但唔使驚，唔係要讀番二、三百年前嘅歷史。章晟曼話，佢哋設計課程時都有考慮與時並進，所以今年新增咗「電子銀行服務」專題，希望可以培養學生嘅創新精神喎。
銀行家親授職場技巧
當然呢個課程最值錢嘅地方，就係一班資深Banker（銀行家）會粉墨登場，擔任講師，教學生了解現時銀行嘅運作同業務；當然啦，最緊要啲Banker同樣傳授啲職場技巧畀學生。
其實花旗呢個銀行業課程已經係第八年舉辦，今年花旗繼續同港大合作，聽講經一輪甄選後，已經取錄咗四十四位學生。