絲絲講場：YGM賣漢登賺到笑
經濟差唔一定要割價傾銷，YGM貿易（00375）連本帶利以近六億元賣出漢登（00448）就有辦大家睇。尋日YGM主席陳永奎（Peter）同副主席陳永燊（Samuel）兩兄弟齊齊讚呢單刁係「雙贏」，利豐（00494）旗下利豐零售買得歡喜，漢登嘅賣出價又高於市價。
佢哋話呢單刁事前唔係傾咗好耐，時間亦唔算拖好長。咁究竟實際投資回報有幾多，Samuel淨係笑得好開心，兼話「原本投資額細到唔識計」。睇番董事會函件，今次YGM扣減相關成本等，累計收益約三億幾，唔怪得尋日有份出席嘅小股東們，都想公司派特別股息啦。不過，好可惜Samuel表示未有呢個計劃。
吼年輕品牌購併
YGM向來出手時機拿捏準繩，○九年收購英國品牌Aquascutum（雅格獅丹）亞洲區知識產權就可見一斑。既然YGM依家有充裕資金在手，加上通街平貨，再次購併新品牌嘅機會似乎好高。不過，行政總裁陳淑玲唔肯漏風聲，僅表示「陸續傾緊其他牌子，主要睇高端同年輕化品牌」。