眨吓眼，仲有幾日就到龍年，好多時「大時大節」都要去賭城美國拉斯維加斯「走番轉」碰碰手氣嘅立法會議員詹培忠，今年竟然轉換口味，由北半球嘅美國轉飛到南半球，過個熱辣辣嘅農曆新年，佢今年揀咗到新西蘭過節。
絲絲即刻問詹培忠，乜新西蘭有賭場咩？詹培忠就答，新西蘭嘅奧克蘭有o架。果然事前做足功課喎！
不過，詹培忠即刻同絲絲澄清，佢今次出發去新西蘭嘅主要目的唔係去賭場玩，而係四處旅遊，睇吓風景。
咁又係新西蘭出名係依家地球上少有嘅樂土，環境一流，風景如畫，詹培忠到當地欣賞湖光山色，歎吓世界都係好好嘅選擇。佢將會喺今日或者明日出發，大概去一個星期至返。
佢仲話依家拉斯維加斯賭城都少咗人去，反為澳門賭場仲好賭。絲絲聽聞佢喺啱啱過去嘅聖誕節都去咗一轉拉斯維加斯，於是問佢有冇斬獲？佢好順口話有，但點都唔肯講贏咗幾多，仲話自己喺賭博方面要低調啲。
咁又係嘅，以佢今時今日呢個地位，真係冇嘢需要去炫耀，加上佢又係立法會議員，為咗形象，係不宜成日將賭錢宣之於口嘅。
余絲韻