市場熱線：光國升浪可延續

呢排的確好消息源源不絕，IMF「籌旗」6,000億美元救歐豬，搵金磚四國、日本同油王夾錢，中國外交部話會執行G20共識，祖國想增加IMF內話事權亦得其所哉。放完長假後，又可炒減存備率消息同養老金入市。歐債危機呢一個月可謂峰迴路轉，之前將長期再融資操作（LTRO）彈到一文不值嘅已經紛紛轉軚。

地主股三月見真章

的確好耐未見個市升得咁高興，恒隆系中午派完成績表，成班地主股即刻開派對。恒隆地產（00101）升近一成，收租婆舊年大幅加租收到笑，尤其銅鑼灣大地主租晒畀珠寶鐘錶舖。恒隆系打響頭炮，但真正放榜期要至下月中至開始，而三月先係戲肉。

中海集運（02866）預告見紅，查實頭三季已蝕咗15.8億人仔，盈警只係循例手續，部分航運股乘機獲利回吐，但中海發展（01138）同太航（02343）反而勁升，原因係瑞信嘅報告發功，不過睇BDI就嚇親人，由舊年尾嘅1,800點跌到得番一半。

中興通訊（00763）下晝開市跟住A股跳水，內地網上傳聞版本係侵權官司敗訴，亦有傳同伊朗做生意或被美國制裁，到三點輪到永暉焦煤（01733）接力跳水，呢排升市亦好多無名腫毒，但唔少股民勇於撈底，令兩隻股低位反彈，但「空穴來風未必無因」。

傳聞有好有壞，有傳太陽能產品會成為家電下鄉新補貼品種，太陽能股再炒起，其實呢段消息有好多疑問，家電下鄉已宣布逐步撤退，仲搞乜嘢新品種？古勝上網搜尋過，原來市面上真係有太陽能雪櫃、太陽能電視，但當然只係好細市場，較普及嘅得太陽能熱水器，就算有着數亦只係益海爾電器（01169），網上報價一部賣3,000幾蚊人仔，又嘥地方，環保要好高代價。

環保發電長線看俏

不過，環保股始終有阿爺照住，光大國際（00257）自從舊年十月換咗副偈，由低位反彈一倍有多，尋日仲破埋頂，咁升法仲以為春江鴨先動，上個禮拜開記者會以為有好消息公布，原來係獲得1億美元銀團貸款發展垃圾焚燒發電項目。內地前排亦曾短炒環保股，但好快就o趙完鬆，難得光國可以升足3個月，連250日線都升穿埋。

隻股優點由前年講到今年，垃圾焚燒發電係國家重點環保項目，可同時解決垃圾同發電問題，而光國係當中龍頭企業，喺江蘇擁有全國最大垃圾焚燒發電項目，而且先進到可以自行生產上游設備兼外銷，呢兩年係建設高峰期，淨係收建設費已遠高過經常性盈利。

古勝一直推介呢隻股時都叫人做長線投資，雖然舊年大部分時間愈跌愈傷心，但好股始終有人識貨，股東守得雲開見月明，長線垃圾會變寶！