依家搭車行街，都會見到好多人攞部智能手機或平板電腦出嚟捽吓篤吓，連帶用智能手機呢類流動裝置購物都愈嚟愈普及。網上付款公司PayPal最近就做咗個調查，發現香港人喺聖誕節差唔多到嘅時間，至「臨急臨忙」用智能手機等流動裝置上網買嘢。
PayPal香港及台灣總經理黃朱寶燕，話個調查分為家用電腦同流動裝置兩組進行，有趣嘅係家用電腦組嘅網購量高峰期喺十二月六日就出現，但流動裝置組嘅高峰期就要等到十二月二十一日先嚟到，足足早咗成半個月。
另外，家用電腦網購最受歡迎嘅網站，排頭位嘅係日式服裝及飾物，至於香水及美容護理產品、淨水設備及中式保健用品網站就分佔亞軍同季軍嘅位置。用手機上網買嘢，頭位係團購，咖啡連鎖店係第二位。睇嚟用電腦同用手機上網買嘢嘅習慣，真係可以好唔同。