之前絲絲都提過，舊年星展有唔少人事變動，話音剛落佢哋又有3位新臉孔見大家。
今次星展就為旗下嘅私人銀行搵咗三員猛將，分別係北亞洲區私人銀行業務主管忻依文、星展中國私人銀行主管龔憶明，同埋星展香港私人銀行香港團隊主管林坤海，3位可以話係成個大中華區私人銀行業務嘅核心人物。
大家可能對忻依文有啲印象，事關佢之前就係建行亞洲香港區嘅私人銀行主管，又做過滙豐私人銀行嘅董事總經理兼大中華區副總裁，對亞太區嘅私人銀行業務有相當豐富經驗。星展可以邀請到佢過檔，相信都花咗唔少工夫。
今次任命覆蓋中、港及北亞區業務，而且全部都係挖角，變動不可謂不大，星展高層當然要解一解畫。星展銀行財富管理部主管陳淑珊就話，咁證明咗佢哋拓展大中華區私人銀行業務嘅決心，同埋佢哋吸納最優質人才嘅能力。