絲絲講場：里昂風水估八月市癲

風水指數：今年多變

里昂由九二年開始，除咗○五年至○八年停過之外，每年農曆新年前都會搞一個風水指數，以風水預測來年股市走勢。

今次嘅風水指數就話，今年係黑水龍年，龍象徵轉變，所以今年會係一個轉捩點；但今年天干地支五行分布比上年平均，所以會冇咁波動，同埋五行欠火，因為水剋火嘅關係，冇火對個市有利；走勢方面，今年頭六個月欠金，個市會牛皮，尤其六月跌幅最明顯；但到咗八月，土金入主干支，將會有強勁升幅！但升到十二月就會慢慢回落，年尾平穩收市，整體嚟講係會先低後高。

金融有運 地產唔錯

板塊方面，由於今年欠火而火剋金，所以金融同銀行呢啲屬金行業走勢會較好，首季後屬土行業都唔錯，如房地產、煤炭同種植，今年年頭年尾天干屬水，利正值旺季嘅娛樂同運輸業，十二月尤其暢旺；但屬火嘅石油、電訊同公用行業今年就麻麻喇！

除咗風水，今年好多人關注嘅就係到底一二年會唔會係世界末日，今次暫時充當風水師嘅分析師周子諾就話，瑪雅人連自己喺十四世紀會消失都測唔中，冇乜理由會測得中世界末日喎！

風水嘅嘢，信不信由你，里昂講到明，風水指數純粹想為大家帶嚟歡笑，如有雷同，實屬巧合；喺份報告入面，自嘲舊年十二個月入面，只估中其中兩個月嘅恒指走勢，有五個月仲係「大錯特錯」，搞到垂頭喪氣咁話！