市場熱線：五礦資源重新上路

港股雖然一向跟外圍，但大戶識揀強勢「大佬」，好似呢排對A股只跟升唔跟跌，而歐豬債券孳息慢慢回落，希臘被標普同惠譽唱衰會違約，美國公司成績表麻麻哋，個市變數仍然幾多，但呢排淨係挾淡倉已夠殺。A股升勢未能維持，而且深圳創業板再次暴跌，又話養老金入市、QFII加大一倍、A股ETF推出，但走勢完全冇路捉。

半新股發憤圖強

電訊股同電訊設備股彈咗一日又再捱沽，另一隻跌幅顯著嘅係華晨（01114），主要原因係管理層減持，喺派成績表前一個月冇得郁嘅情況下，係唔係預示成績表唔樂觀呢？其實管理層買賣股票無可厚非，最緊要唔好一面唱好、反手就沽。華晨主席估計今年寶馬銷量增長至少兩成，但公司最大問題係估值過高。

細細粒新股繼續博大霧，允升（01315）急升33%，隻股只係提供截至舊年三至六月嘅3個月盈利，但計一○/一一年度PE係7倍幾，亦要提醒大家，本地建築股除中國建築（03311）外一向冇乜成交。舊年尾上市嘅半新股亦發力追落後，新華保險（01336）同寶信（01293）分別升8%同6.5%，但高位都差少少未能重上招股價，大行發功再起作用，呢兩隻同中信証券（06030）有大行唱好，華保同信証A股則要跌。

祖國傳第二季會恢復審批新建核電項目，幾隻核電股應聲彈起，但呢個消息亦已炒過N次，古勝都認為核電翻生係遲早嘅事，如果連核電都唔玩，點樣去「保增長」？諗吓下輪炒落後開邊瓣較高追更值博，藥股可以考慮，雖然冇乜可炒因素，但股價落後已係最大條件。

金屬股係其中一類翻生股，靠美鋁報喜及「銅博士」帶動，但呢輪最勁仍係鋼鐵股，所以「衰股」值得特別留意。炒完一線就要吼二線，例如五礦資源（01208）、洛鉬（03993）、湖南有色（02626）之類。

走出去遇到阻滯

五礦舊年玩高台跳水，由6.86元撻落2.39元，轉型做海外礦產旗艦偏偏遇着市況急跌，結果no money no talk，舊年以63億加元收購贊比亞銅礦單「刁」流產，而縮水改用13.3億加元買剛果銅精礦亦拖到下月中，買唔買得成仍係未知數。不過，五礦轉型已洗濕個頭，內地資產已賣番畀阿媽，未來去外國掘礦係唯一出路。

中國公司去外國買礦通常被當水魚，對股東來講未必有着數，但國家有錢又唔夠資源，最佳方法係阿爺或中投先泵錢落上市公司，再由上市公司出面買資源。金屬價格近日雖然稍為回升，但比起舊年仍然低咗好多，所以五礦舊年收購遇阻滯焉知非福，今年有機會執平貨。五礦本身亦變成平貨，如果要做大做強先要谷起股價，然後向市場伸手攞錢做收購，舊年本來已行緊呢條路，但遇着股市大跌要急煞車，當市況回穩可望重新上路。