雖然滙控（00005）近年喺美國業務搞到焦頭爛額，仲好努力咁剝離當地業務，但係未有放棄喺美國吸納人才。佢哋個首席法律官Richard Bennett即將退休，於是喺美國政府入面搵到位啱嘅人才接任，尋日正式宣布美國財政部負責反恐及金融情報嘅前副局長Stuart Levey加盟。
滙控話Stuart仲會同Richard共事一段時間，交接期完咗之後，Richard都會繼續做顧問。事實上，銀行有責任確保資金「乾淨」，亦都係監管機構嘅要求，特別係歐美銀行都花唔少心力喺反洗黑錢同反恐資金度。年僅48嘅Stuart，反恐經驗豐富，係美國前總統布殊同現任總統奧巴馬兩朝元老，啱晒滙控。
滙控行政總裁歐智華都話，Stuart搞國際金融同法律問題經驗豐富，同環球銀行好有關聯，好高興有佢加盟。Stuart上任之後會駐守倫敦，直接向歐智華匯報。
余絲韻