絲絲講場：番薯梁 喜羊羊 拜早年入晒戲
有「紅籌之父」之稱嘅意馬國際（00585）主席梁伯韜，以往見親佢都好嚴肅，依家身份轉咗，次次見到佢，都會見到佢嘅「拍檔」喜羊羊同灰太狼兩位卡通人物，尋日仲一副賀年look，真係「全身」投入搞好佢。
未來新搞作 動畫加真人
梁伯韜花名番薯梁，尋日件賀年衫係金黃色，都有少少番薯味道。絲絲估，今年農曆新年將會有《喜羊羊與灰太狼4》電影同大家一齊迎接龍年，番薯梁梗係落力谷啦。佢嘅賀年look已經夠晒搶鏡，連過年祝賀說話，都同化身財神爺嘅灰太狼同埋學生嘅喜羊羊扣上關係，的確別具心思，仲話會將呢個品牌繼續延伸。
意馬行政總裁蘇思偉話，有信心電影票房可以維持舊年第三套收1.47億元人民幣嘅強勢。喜羊羊同灰太狼好受歡迎，佢哋已經度定計延續熱潮，出年暑假會有新搞作，兩位卡通人物會夥拍真人合演電影，同大家一齊迎接呢個炎炎夏日。雖然未有咁早知道電影內容，但噱頭已經十足啦！
番薯梁睇慣數，所以都預備咗一堆財務數據，證明公司好OK，好似公司手持現金有3億元、無負債、不時會考慮進行收購……佢仲話，公司業務重心以內地為主，而且會繼續朝文化產業方向發展。私人投資呢？會考慮喺內地政府推動嘅內銷同文化產品相關，電子商務業務，不過就唔會掂礦業啦。
余絲韻