孖妹缸湖遊：今年揀股新不如舊？

沈：訊匯證券行政總裁沈振盈

祺祺： 沈大師，我同高妹去玩測字，師傅話一字記之曰「新」，佢係咪叫我哋今年炒新股呀？

放大圖片

放大圖片

　沈： 炒新股好講求市場氣氛o架！首先散戶要對新股出現投機性嘅熱情，因為任何一隻新股喺上市後，股價都可以爆升，理由一定係依靠散戶嘅「一窩蜂」兼「博大霧」嘅投機心態。當市場炒賣氣氛熱烈，市場信心就會有力湧高新股價格，不過依家港股又無氣氛，又無熱情，所以我唔多睇好新股市場。我睇今年恒指會喺17,000點至21,000點上落，上半年港股走勢還可以，但下半年會轉差，如果有啲新股係喺下半年先至來港上市，散戶就真係掂都唔好掂呀！

祺祺： 等我仲以為今年炒新股就係新希望添！

　沈： 投資講求機會成本，依家市場上有咁多又平又靚嘅股票畀我去揀，咁我點解要買新股呢？須知道，新股既無股價往績支持，股價走勢又飄忽不定，咁樣仲走去博？贏少輸多喎！相反，如果你喺低位買入內銀股，又肯守一段時間，依家股價都升番三成喇！散戶要記住，炒股票一定會有取捨，但重點係要識得咩股票叫做平，咩股票叫做貴。

祺祺： 舊年大約有90隻IPO上市，當中包括嘉能可（00805）、周大福珠寶（01929）同普拉達（Prada，01913）呢啲星級名牌股，不過可惜佢哋個股價都係麻麻呀！

寧吼實歐債危機發展

　沈： 你哋唔好再諗翻炒新股喇！講真，我認為內需、消費、零售呢啲板塊已經炒完。好似周大福咁，我唔係話真係無得炒，但要等到股價被人挾高之後再大跌，再炒上嘅機會先會再掂囉！加上今年來港上市嘅新股比較細隻，與其放心神落去，倒不如緊貼歐債危機發展喇，依家歐元區做嘅所謂救市方案只係止咳，而唔係止血架！

黃：靈獅控股主席兼行政總裁黃偉康

高妹： 雖然今年來港上市嘅新股無舊年嗰啲咁重分量，但有研究機構預計今年IPO數目會近100宗，集資額為2,300億元。

睇好油價上試148美元

黃： 今時今日炒新股好難賺到錢，第一點係市況唔就，第二點係財金名人入股效應已經失效。你睇番上年上市嘅大部分新股股價都潛咗水就知喇！我覺得舊年係得一隻米蘭站（01150）算叫做成功，原因係市場上欠缺同類型嘅企業。至於周大福，其實我唔明點解佢要搞上市？新世界發展（00017）主席鄭裕彤又唔係等錢使。

總之新股難賺錢，大家不如留意吓石油股仲好喇！現時伊朗局勢緊張，加上地緣政治不穩、新興市場對石油需求增加，以及資金搵地方泊岸嘅情況下，國際油價已經突破每桶100美元大關，我睇今年油價可以再試番148美元高位，散戶可以買吓中石油（00857）、中海油（00883）。

高妹： 即係今年投資策略都係「新不如舊」喇！

　黃： 傳統基金有個基本投資原則，就係唔鍾意投資上市只有兩年嘅新股，原因係好多新股為咗成功上市，會將盤數整到好靚，第一年個股價可能會企穩甚至爆升，但好多喺第二年已經後勁不繼，咁當然工行（01398）、建行（00939）、國壽（02628）係例外喇！如以內銀股去睇，你都見到首先來港上市一定係最優質兼最大隻嘅銀行，之後再上嘅銀行，其規模及質素一定有啲參差。

高妹： 你又講得有道理喎！咁恒指走勢又如何呢？

　黃： 今年好多人都睇得幾淡，相反我就幾樂觀喎！我睇恒指會喺17,500點至24,000點，整體走勢會呈波幅收窄嘅格局。就算遲啲歐債危機真係爆出大鑊嘢，但依家市場及投資者都有晒心理準備，根據相反理論去睇，我唔覺得歐債爆煲會對港股產生好大影響囉！

你認為今年港股會應驗「一月效應」升市嗎？

股場上有「一月效應」之說，即股市在一月上揚，全年股市會錄得升幅，相反一月下跌，股市全年表現會偏淡。近十年港股時有應驗「一月效應」。你認為今年港股會應驗「一月效應」升市嗎？據今期《東方產經》網上民調，截至上周末晚上六時嘅結果顯示，55%表示「會」，45%表示「不會」。

高妹、祺祺

若有料報畀高妹同祺祺或有嘢問，可電郵money.biz@opg.com.hk