市場熱線：聯通隨時有驚喜

不過，唔少大行仍唱好內需股，瑞銀睇康師傅（00322）目標價超過30蚊，即係一一年PE超過40蚊，古勝長線睇好康師傅都覺得有啲離譜。

A股吹無定向風

講番石油股，傳過N次嘅暴利稅卒之降低，但故事已係「狼來了」冇人信，之前幾日石油股已升定先，但當時覺得係因為國際油價上升同埋炒成品油定價機制改革單消息，結果3隻石油股上周五都係大陰燭收市，有趣嘅係高佬、大摩同花旗各自唱好中石化（00386）、中海油（00883）同中石油（00857），其實邊間最得益有數得計，同海外油田亦無關，所以第4、5大石油股昆能（00135）同中信資源（01205）都冇乜着數，反而MI（01555）有得升。

新政策之下，油股可以畀少好多稅，但只係補番之前資源稅嘅損失。內地亦有消息話出年開始局部徵碳稅，即係污染者自付，而水泥股因排放二氧化碳而要科水，上周五水泥股跌得慘烈，惠譽又撈過界踩多一腳預測水泥價格將再下跌。

祖國嘅消息最衰唔知真假，有時唔知幾時真幾時假，有時特登放風去試探市場反應，傳得一兩年又突然實施，好似房地產稅、資源稅同今次降低暴利稅，至於成品油自由定價更係疑幻疑真，縮短調價周期好合理，但自由定價唔似阿爺作風。

恒指上周五跌220點，一度跌超過300點，但A股下晝突然翻生亦帶動港股跌幅收窄，人行話過年前都唔再發行央行票據，並開展短期逆回購操作，但有分析話阿爺只係想大家過年前唔使咁水緊，未必代表就快減RRR。總之，呢排A股好似無定向風，但跌咗年幾已令人心淡。

舊年嘅「藍籌王」聯通（00762）新一年亦係兩升兩跌，「哎瘋4S」又有得賣嘞！零機價套餐係每月286蚊人仔3年約。聯通舊年採上中下三路攔截，結果高低檔用戶通殺，搶咗祖國移動（00941）同中電信（00728）唔少客仔，所以舊年喺大隻佬榜一枝獨秀亦有道理。

高低檔用戶通殺

聯通下路有千零蚊嘅入門級智能手機，中路有「小米」機，上路有「哎瘋」，加埋CDMA喺3G網絡發展較為成熟，所以喺3G爭霸戰佔得先機並非偶然，但上客卻較為慢熱，不過舊年下半年3G上客量連續6個月增加，到年尾兩個月更分別急升292萬同338萬，喺3G市佔率超過40%，巴克萊估計今年3G上客量可達至2,600萬戶。

電訊係固定投資生意，多個客就多筆利潤，所以ARPU雖然會被拉低，但對公司仍係有利。公司有客即係有現金牛，而且唔同以前係祖國移動嘅二奶，呢兩年叻過對手多多聲。祖國移動要反勝惟有靠4G，但到發展成熟兼用家接受又要等幾年。聯通喺17.68元形成雙頂，近兩個月3次去到17蚊之前又止步，走勢未有突破，但上客數據如果延續之前嘅走勢，加埋今個月又有「哎瘋4S」嘅推動之下，有力突破一啲唔奇。