香港人最鍾意啲咩？絲絲相信，蘋果公司（Apple）嘅產品同英超聯一定排喺頭幾位之內。絲絲最近就八到，佢哋有機會二合為一喎！
由英國天空電視（Sky）擁有嘅英超電視轉播權今季尾到期，到時要再重新競投。尋日就有消息話，除咗天空電視、ESPN同中東電視台Al Jezeera呢幾間大台之外，蘋果同埋佢嘅老對手谷歌都打算參與競投喎！簡直鬥到難分難解。
其實喬布斯喺過身前，已經話諗通咗點樣去做一部好嘅智能電視Apple TV，仲傳出蘋果公司嘅幾位主管向傳媒公司嘅主管介紹，話開發緊一部可以感應聲音同動作嘅電視，可以用iPhone同iPad做遙控。
有分析就話，蘋果今次買英超轉播權，可以幫到Apple TV打入英國市場，仲可以谷埋iPad銷量，計絲絲話，如果到時買部Apple TV就有得免費睇波嘅話，就一定大把人買。順帶一提，蘋果宣布iPhone 4S將於一月十三日正式進軍中國，但絲絲知道其實聯通用戶已率先預購iPhone 4S。