絲絲講場：周董KTV預告上市
「將公司上市」係唔少創業者用以證明自己實力嘅方法，就連紅透亞洲嘅台灣著名歌手周杰倫亦唔例外。佢斥資三千萬人仔搞嘅KTV就快喺西安開幕，仲以自己專用符號「真愛‧范特西」命名添。聽講佢仲唸住五年後搬間KTV喺A股上市，誓要做名副其實嘅「周董」。
擬五年後A股掛牌
周杰倫近年成為台灣吸金力最強嘅藝人，極具商業頭腦嘅周董先後投資餐廳、舞道館、服飾等，早前仲獲美國《Fast Company》雜誌評選為「全球百名商業創意人」之一。
前幾日周杰倫宣布，「鍾意K歌嘅朋友要注意，半個月後，我嘅『真愛‧范特西KTV』即將登陸西安。」聽講KTV坐落喺西安嘅黃金地段，好多包廂係以佢經典歌曲命名，好似「青花瓷」、「菊花台」、「龍捲風」等。周杰倫唔排除將事業做得更大，除咗開全國連鎖店，仲期待五年後喺內地上市。