市場熱線：哈電有機會轉勢

輪證成交增加更為明顯，牛熊證成交較前日多1.2倍，恒指朝早高開近百點，結果有11隻熊仔打靶。沽空金額亦增至34.8億元，其中盈富（02800）有一半係沽空，大戶又想做世界乎？但沽空最佳工具始終係期指，尋日成交得5.7萬張，臨尾高水44點。

沽空期指做世界

A股點解咁差只能用走資去解釋，有人歸咎溫總話今年首季經濟可能比較困難嚇親街坊，首季經濟邊個唔知阿媽係女人，個市要跌只係夾硬搵個理由。尋日A股以釀酒、水泥、環保走勢較差，但靠石油股頂住，傳聞今日商務部會公布刺激消費方案，不過消費股仍係冇人吼，香港嘅車股同電器股亦全面回吐，但創維（00751）續升3.4%。

銀基（00886）有彤叔入股，即升近4%，但彤叔嘅「往績」其實大家心照。由今年開始，中央部門使阿公錢要用公務卡，有分析話會影響酒類銷量喎（原因唔使畫公仔畫出腸），尋日釀酒A股跌到七彩，銀基代理嘅五糧液亦跌4.4%。經銷代理股一向有較大風險，尤其代理單一產品，畀人回收代理權就乜都冇，好似大昌行（01828）日前冇咗賓利獨家經銷權。外國品牌打入內地市場初期要搵盲公竹，但到咁上下時候就肥水不流別人田。

中國金融租賃（02312）舊年尾突然升到發癲，原來上演一幕高台跳水，較上周三高位大插逾七成，高追細價股隨時係死亡遊戲，呢類投資公司暴升暴跌實在唔啱散戶玩，睇番隻股NAV其實得兩仙幾。尋日亦有間投資公司華保（00810）升一成收0.375元，但NAV得0.067元。

中通服（00552）宣布供股計劃之後，兩日累升一成，同文股博士兄周二已分析過隻股供股前景，在此唔想執口水尾，但供股價折讓僅8.8%（周二開市前計），證明幾有信心。

核電概念夠煞食

個市唔上唔落，唔想搵命博仍有唔少選擇，舊年買中恒安（01044）、維達（03331）同中石化（00386）真係恭喜晒，有先見之明嘅人係睇趨勢，例如鐵路股同核電股都曾經風光過，至於「意外」嘅嘢冇人能夠預測，今年鐵路投資仍未完全恢復，剩低核電望天打卦，但核電唔同鐵路，因為長線可以慳錢。

古勝舊年尾推介過東氣（01072）同上電（02727），如果唔想為核電估估吓，可以考慮吓哈爾濱電氣（01133），今年火電投資環境肯定遠勝舊年，除咗已獲准加價之外，煤價亦已回落，今年電廠有更大意欲投資設備。

哈電股價連續兩日反彈有勢，相信係市場換入啲低估值嘅公司有關，哈電嘅預測PE係單位數字，明顯低過東氣同埋上電嘅12倍，後兩者有核電概念，增長潛力似乎較佳，但投資者亦要睇較長線。所謂各花入各眼，哈電今年嘅定單增長相信會較快，如果能升破7.5元嘅下降軌的話，今年將有機會轉勢。

古勝