孖妹缸湖遊：今年立立亂危機盡現

丁：廣發期貨副總經理丁世民

祺祺： 舊年個個都睇好大市嘅時候，你係第一個話個恒指會大幅下滑。到咗今年，你又點睇大市表現？

至九月或失守萬二

　丁： 我都係睇淡呀，因為港股繼續受外圍經濟影響，而歐美咁多隱憂，港股表現又點會好呀！恒指會喺首季稍為做好，升至今年高位20,500點之後，喺八、九月就會下挫至11,800點。

高妹： 嘩！我哋聽到11,800點呢個低位，即刻嚇到個心仔噗噗跳呢！點解會咁低呀？仲係唔係受歐美債務所拖累呀？

　丁： 無錯呀，不過歐債講咗咁耐，今年會淡化o架喇。歐盟峰會應該會喺三月推出解決方案，另希臘、意大利等「窮親戚」亦會有機會退出歐元區，可以利好歐元兌美元喺下半年上揚至1.5水平。然而美債其實比歐債更嚴重，所以今年市場會將焦點轉番去美債問題上，要知道美國債務佔國內生產總值（Debt-to-GDP）嘅比例高達62.9%。另外，今年係美國總統大選之年，經濟政策將經常成為兩黨之爭，影響救市力度。因此，今年嘅美債息率勢必上升，增加發債成本。

祺祺： 咁今年嘅環球經濟趨勢咪危危乎囉！

　丁： 今年都係多事之年，唔少國家如德國、意大利等都會更換管治班底，為環球金融市場帶嚟不明朗因素。而中國亦會喺今年召開「十八大」，屆時會決定高層重要人事，由於處於權力交接期，中央施政會欠缺彈性，故此A股首季仍會下跌。之不過，A股一直行得快過美股同港股，雖然依家A股仍係弱，但內地喺改朝換代過後，不明朗因素會減退，就會帶動A股率先反彈，預料上證指數會喺第四季升至2,400點，屆時就可利好港股表現。

高妹： 聽你咁講，股、債市場都不宜投資，咁我哋可以投資啲咩呀？

　丁： 其實大家可以留意黃金。由於美元轉強，黃金無咗避險對沖嘅功用，所以呢幾日跌得好犀利，我估計金價仲會於短期內跌至每安士1,300美元添。不過大家又唔好驚，1,300美元呢個價位係吸納時機，可望喺今年年尾升至每安士2,000美元。此外，大家仲可以留意白銀呀，雖然白銀價格現時呈下跌趨勢，但市場對白銀的需求將會有增無減，故此白銀嘅升值潛力很高，將會喺年尾升穿每安士50美元。

無疑今年以「危」居多，但天大證券資產管理董事施俊威（Ray）認為有「危」先會有「機」，早前高妹同開阿Ray傾偈，先發現佢係今年少有嘅「好友」，認為今年港股表現並唔會如外界所想般下挫，反而認為恒指有機會於年尾升至22,000點呢！

施：天大證券資產管理董事施俊威

祺祺： 唔少分析員認為今年恒指會延續上年嘅跌勢，但你卻反其道而行喎！

　施： 係呀，今年個個分析員都話港股會步入熊市，甚至乎會有「終極一跌」喎，但係我認為自○七年金融海嘯發生至今，牛市都未曾離開過，今年港股依然會「牛」落去！今年年頭個恒指會稍為動盪，低位會喺年中出現，大約處於16,000點水平，但屆時各國會推出刺激經濟方案，帶動大市上升至22,000點！

高妹： 嘩！如果真係可以衝上22,000點，就唔使愁啦！

　施： 依家個個都係擔心歐債危機，或會觸發歐元區解體，但我覺得機會極微囉。歐洲其實可以印銀紙去解決負債問題o架嘛，若然歐盟實行歐洲金融穩定機制（EFSF）槓桿化及推出歐洲穩定機制（ESM），金融體系便會漸趨穩定。此外，中國現時存備金率雖為21%，但金融海嘯時只係15.5%咋，所以中央大有下調存備金率嘅空間，預料中央將會下調存備金率，有助市場資金流，刺激大市表現。

吼實內銀股有着數

祺祺： 你果然好「牛」呀，咁我哋可以留意啲咩呀？

　施： 今年中央會下調存款準備金率，而新增貸款亦會維持喺合理水平，有利內地釋放資金，幫助內地銀行嘅業務發展，所以投資者可留意內銀股，加上中國着重「三農」概念，可留意農行（01288）及重農行（03618），兩者前景發展均較為理想。

你的2012年恒指目標價多少？

令股民失望的一一年已成過去，而多間券商亦已預測一二年恒指高低位，向上有挑戰25,000點，向下則或驚見12,000點。你的一二年恒指目標價多少？（28.12.2011）據今期《東方產經》網上民調，截至上周末晚上六時的結果顯示，13.1%表示「25,000點或以上」，43.8%表示「20,000點至24,999點」，21.2%表示「15,000點至19,999點」，21.9%表示「15,000點以下」。

高妹、祺祺

若有料報畀高妹同祺祺或有嘢問，可電郵money.biz@opg.com.hk