市場熱線：迎接機遇順勢而行

相反理論隨時應驗

魚缸升跌本係平常事，但上周五成交得246億元就令人眼冤，睇怕到新春前都繼續拍蚊。有經紀朋友話上周五不但冇發市，連電話問價同打牙骹都冇，如果情況持續，今年肯定有唔少股票行頂唔順執笠，唔使為第二輪加時同期指夜市煩惱。

二○一二年股市展望大把專家噏，通常目標價都會令股民有所期望，較保守嘅會話今年先低後高。不過，今年首季十個專家九個唱淡，而當呢個情況發生之時，亦可能出現「相反理論」，所以淡友都唔敢放肆，搞到依家十個股民九個觀望。

專家睇淡首季表現的確有根有據，最受關注嘅有3樣嘢：賣債、成績表同評級，而幾萬億歐債到期點去填氹會決定短期生死，歐洲央行借咗5萬億畀錢莊，冇理由睇住條鐵達尼沉沒，所謂船到橋頭自然直，古勝相信最終會大步檻過。不過，過咗呢關前路仲有排捱，經濟衰退加埋債息高企，評級機構一旦大開殺戒，隨時真係迷失十年。

美股竟然喺舊年仲有得升，美元同美債成為資金避難所，但係來緊又到放榜期，第四季業績唔敢睇好，皆因同期歐元大跌，淨計匯兌損失已好襟計；標普成分股其實超過一半生意靠外地，遲早會受波及。今年係大選年，例牌會推貨幣寬鬆政策製造繁榮景象為連任鋪路，就算連任失敗，蘇州屎會留畀下任總統，但QE3暫時唔使望，經濟數據咁靚仔，奧爸媽民望又回升，推QE3都起碼等第二季或下半年。

谷消費減稅最實際

一一年最後一個交易日連粉飾櫥窗都慳番，國指倒跌，恒指以18,434點收市，好多人當咗16,200點已經係鐵底，個市衰極有限，古勝唔敢咁老定，但熊市中亦有唔少搵錢機會，舊年十月由萬六衝上兩萬係全年最大反彈，但機會亦轉瞬即逝。依家通街平貨，芬佬手上亦大把現金，○九年當大家覺得絕望嘅時候就開始轉角，所以密切留意「終極一跌」。

祖國畀人係咁唱衰，雖然人仔呢排爭番啖氣，但離岸價仍預測會貶值，今年保八要靠晒內需，內地口惠而實不至，買車同買電器優惠唔係縮水就係收檔，而鐵路投資亦大幅減少，令人懷疑阿爺有幾多誠意。

有消息話今個禮拜會有新促進消費政策公布，之前已有內地傳媒吹水。消費呢樣嘢最緊要睇收入同前景，而減稅、派錢、派消費券同消費補貼就最實際，最怕就係大隻講。

王老吉「紅綠之爭」上個禮拜開庭未有結果，聽講仲有排審，廣藥（00874）已停牌兩個月，唔知幾時可復牌，要買要沽都唔使諗。霸王（01338）同瑞年（02010）亦有賣涼茶，唔知可唔可以漁人得利，而中糧包裝（00906）主要客仔係紅罐王老吉，所受影響係最大。講開瑞年，隻股係農曆新年送禮概念股，舊年過年前亦曾經炒過，但跟住差唔多跌足一年，依家嘅PE得5倍，光棍佬教仔便宜莫貪，至於短炒就最緊要定好止蝕位。

一一年仍有8隻股票升超過1倍，大部分都係細奀奀股，但數碼通（00315）亦升1倍主要多得「哎瘋」。今年有好多不明朗因素，暫時毋須斷估，最好見步行步，古勝祝各位新一年順勢而行，逆風而立！