絲絲講場：梁志堅與新世界正式bye bye
舊年十二月啱啱退任新世界集團（00017）執董嘅集團「開國元老」梁志堅，一年後嘅今日，就連非執董同首席顧問都唔做，正式告別做咗40年嘅新世界系啦。堅叔睇住絲絲大，梗係要盡訴心中情啦。
堅叔話：「好多謝純官（鄭家純）畀機會我做嘢。」其實早喺今年一月一日佢已正式退休，依家交代妥當咪辭任囉，講到佢都有啲眼濕濕，畢竟堅叔嘅寶貴青春都畀晒彤叔（鄭裕彤）同新世界。
指人做嘢 不合性格
堅叔語重深長咁講：「我係落手落腳做嘢嘅人，事事親力親為，出任顧問無得樣樣跟足，問起意見又要答，好似指指點點人哋做嘢咁，唔太適合自己性格。其實鄭家純先生都有叫我做多一、兩年先，不過我想趁聖誕、新年等長假期休息吓，但暫時無計劃出埠，等過完農曆新年再考慮。日後新世界有咩要幫手畀意見，都會應承。」
至於會唔會專心做地產建設商會，堅叔話，當獲委任為執委會主席時，已向大家表明，唔好因為自己喺新世界做嘢而選佢，未來會繼續工作一段時間。
下月起再無職位
堅叔已同時辭晒新世界發展同新世界中國（00917）嘅非執董，一月一日起生效。彤叔嘅周大福王國，今年真係發生咗好多嘢，後浪推前浪，令絲絲都不禁思潮起伏。
新世界嘅老友亦同絲絲講，兩間公司嘅執董，依家都係彤叔、純官，同鄭志剛等第三代做執董。明年，新世界系就真正係鄭氏天下。不過，隨住周大福珠寶（01929）上市做股王，新世界系就股價尋底，或者亦代表一個時代嘅終結。
絲絲仲好記得，彤叔早前響周大福珠寶上市時講：「係了咗個心願」，純官亦揚言已經接掌家族帥印，最快要20年後至會交棒，即係純官都希望可以好似老竇彤叔咁，做到八十幾歲。
余絲韻