孖妹缸湖遊：港股今個聖誕好快落？

聖誕節係傳統嘅旅遊同消費旺季，相關股份嘅往績表現一向不俗。不過，今年大市陰霾滿布，航空股同消費股可唔可以藉住節日個勢，展開聖誕升浪呢？

黃：耀才證券市場研究部高級分析員黃偉豪

耀才證券黃偉豪

放大圖片

李：新鴻基金融資料研究部分析員李惠嫻

高妹：哈，喺旅行社遇到你哋，真係咁啱嘅！聖誕節就到，你哋係唔係諗住去旅行呀？

　黃： 聖誕節係旅行旺季，香港人當然唔會放過呢個機會，平時連喘息時間都無嘅打工仔，難得可以連放幾日假輕鬆吓喎，梗係想離開香港，去吓旅行叉吓電架。哈，我都會趁機同女朋友一齊去韓國，過一個白色聖誕呢！

　李： 唉，我本來想去北海道架，但點知機位同酒店都滿咗喇，加上團費又好貴喎，惟有等淡季先去啦！

市淡航空股難炒起

祺祺： 唉，我都係訂唔到機票呀。其實，咁多人喺聖誕節去旅行，航空股係咪應該會受惠架呢？

　黃： 聖誕節無錯係可以利好航空股嘅表現，但都要睇番佢哋嘅基本因素。受到歐債危機拖累，環球股市喺十月有明顯下挫迹象，削弱咗市民嘅出國意欲。另外，人民幣貶值同油價持續高企等宏觀經濟因素，都令到航空股嘅前景顯得不明朗。可見今年個市有太多負面因素，或者會蓋過聖誕因素，所以航空股未必可以被炒起o架！

　李： 過去兩年，臨近聖誕節嘅交易日，航空股都有炒作現象，大約維持一星期啦！不過，儘管短線有利好作用，但中長線前景仍備受看淡。因為不少內地航空公司都有發債，並以美元結算為主，而近期人民幣貶值，就直接影響到航空公司嘅匯兌收益。另外，環球經濟增長放緩，中國出口數據明顯下滑，航空公司嘅貨運量自當減少，業績亦難免受到影響。仲有呀，環球經濟下滑勢必拖累油價表現，不過唔少航空公司都有燃油對沖合約，而我哋又唔知個價位喺邊喎，為航空股添加咗不明朗因素。所以呢，即使聖誕假日為航空股提供短線投資空間，但我亦唔建議長線持有。

高妹： 係呢，我依家喺度諗緊買咩聖誕禮物畀男朋友仔，真係諗到我頭都大埋，你哋買咗咩禮物呀？

　黃： 哈哈，我會買條頸鏈畀女朋友，雖然唔係好名貴，但都係一番心意呢！

　李： 我家姐前排去歐洲公幹，趁依家啲歐元咁平，我咪叫佢幫我買個銀包返嚟，當做聖誕禮物獎勵吓自己呀。

祺祺： 適逢聖誕節，個市道好旺，周圍都人頭湧湧，個個都喺度買聖誕禮物，唔知消費股會唔會因此而做好呢？

　黃： 聖誕佳節前後，零售業表現都會較為理想，其中以高消費品的相關股份可看高一線，或有短期爆發力呀。投資者可留意普拉達（01913），雖然Prada（普拉達）來自意大利，係「歐豬五國」之一，但其業務未受波及。相反，首三季淨收入更錄得74%的增長。其實，Prada嘅業務範圍已逐漸東移，倚賴亞太區市場，所以未受歐債問題所拖累。我哋行街經過Prada門口，都見到以內地人為主嘅人龍啦！

　李： 聖誕將近，唔少市民都紛紛搜購聖誕禮物，珠寶類別更係大熱！所以我睇好珠寶股，大家可以留意吓六福（00590）和周大福（01929）。六福喺內地嘅增長步伐迅速，其市盈率亦唔算太高，約16.2倍。另外，儘管周大福股價喺掛牌後潛水，但其規模同市場佔有率較大，加上增長步伐快，故此有升值潛力呀。

祺祺：傳統說法都話「聖誕鐘」響起，股市就會上揚，唔知今年會唔會有呢個情況呢？

　黃：「聖誕鐘」說法都講咗幾年，以往港股喺聖誕節前後嘅表現都較好，但今年可能未必啦。因為今年市場存在唔少隱憂，歐債問題係其一，內地調控政策亦會拖累港股。

　李： 受到假日氣氛影響，市民嘅投資情緒傾向樂觀，所以喺聖誕節時股市多出現升浪。不過，今年嘅升浪未必顯著，投資者要留意吓歐債嘅發展趨勢，因為國際評級機構將歐元區十五國嘅信貸評級列入負面觀察名單，為市場帶嚟壓力。

華經濟存下滑風險

高妹： 等我仲諗住趁年尾入番幾手，食番個尾胡o架嘛，但聽你講完，真係要再考慮吓喎！

　黃： 係呀，後市會持續備受看淡。我預料歐債問題會延續到明年，港股會持續尋底，直至下半年，若歐元區各國政策配合，才可望有轉機出現。此外，明年年中係美國大選時，總統奧巴馬為爭取連任，定當推出刺激經濟措施，以增加民望，將有利美股同港股表現。另一方面，中國經濟有下滑風險，因此中央政府需要出手，以放寬緊縮政策嚟穩定經濟，預料明年第二季之後，放寬步伐將會加快，屆時港股先有機會做好。

今年聖誕節你會增加抑或減少消費？

聖誕節是傳統銷售旺季，但今年投資市場突然降溫，通脹卻升溫，難免影響消費情緒。相較去年，今年聖誕節你會增加抑或減少消費呢？據今期《東方產經》網上民調，截至上周末晚上六時的結果顯示，35.9%表示「會大幅減少 」，28.2%表示「會略為減少」，14.6%表示「與去年相若」，21.3%表示「會增加」。

過去10年恒指十二月份表現

年份 恒指變幅

2002 -7.43%

2003 +2.10%

2004 +1.21%

2005 -0.41%

2006 +5.30%

2007 -2.90%

2008 +3.59%

2009 +0.23%

2010 +0.12%

2011（截至上周五） +1.65%

高妹 祺祺

若有料報畀高妹同祺祺或有嘢問，可電郵money.biz@opg.com.hk