市場熱線：華創有買貴無買錯

古勝一個禮拜前預測會進入單邊市，可惜似係向下格局，上星期「4跌1升」，但埋單只係跌百幾點，尚未見「直落」，沽空又再活躍番。放長假前夕，唔使問阿貴成交一定淡靜，大戶要挾上或挾落只要好少本錢，靠邊站較為上算。

救市消息似層層

幾個傳言被懷疑係出口術居多，咁啱上周五係滬深300期指結算日，總之古靈精怪，而人仔上周五朝突然反彈，令到救市消息變得似層層。唯一確定嘅係RQFII卒之啟動，200億人仔有兩成可以投資A股，即係得40億人仔，但如果4萬億養老金入市就天與地比，不過話明係養老金，放落風高浪急嘅金魚缸其實真係好大爭議性。

阿爺救市亦係唔救唔得，FDI喺二十八個月來首次負增長，4大錢莊存款流失4,000億人仔，資金流走情況幾明顯，歐洲佬班資回朝實屬正常，祖國再減RRR係遲早嘅事，但內房股上周五升得幾誇張，發改委話出年會研究商品房反暴利，阿爺想樓價跌又唔想佢死，所以內房股嘅策略仍係炒上落。

鐵路股亦靠出口術，李克強話鼓勵民間投資玩鐵路，所以南車（01766）同中鐵（00390）都急升。漢登（00448）話依據收購合併守則停牌，其他賣衫股當堂趁機會炒起，但漢登主要係打台灣同南韓市場，就算被其他財團睇中，亦非睇好香港零售市場，所以咪表錯情。

浩沙（02200）最多潛水兩成，收市奇迹重返招股價，呢排上市嘅中小型新股全部大上大落，睇招股反應得啖笑，以浩沙為例，得21球係散戶（公開發售）認購，國際發售佔378球，上周五成交額得40球，其實已同創業板上市「圍飛作歹」冇乜分別。相反，OTO（06880）散戶認購爆燈嘅下場，大家都有眼見。

當華創（00291）第三季成績表嚇人一跳之後，古勝已叫人喺25蚊樓下撈貨，皆因呢類股唔慌輸得去邊，同恒安（01044）、青啤（00168）一樣攞咗免死金牌，高PE都唔緊要，中國咁大市場，長遠增長唔使懷疑，外國基金買中國內需概念一定唔少得呢幾隻。

超市業務錢景佳

華創呢幾年不斷擴充同收購超市百貨業務，新開店舖表現自然不及舊店，所以會拉低短線盈利，但當布局完善之後，未來錢途將相當和味。而做超市唔似賣衫賣鞋，所賣嘅都係必需品，亦不受品牌潮流同受歡迎程度影響，因此屬有買貴冇買錯，何況華創股價調整到呢個位之後已經唔算貴。

華創嘅啤酒業務更係一路穩定增長，五豐行同純淨水業務收入增加但盈利下跌，但依家通脹正逐漸回落，各項業務嘅毛利率都有機會回升。

古勝