絲絲講場：網民1日狂買43億
十一月十一日係結婚嘅好日子，啱啱過去嘅十二月十二日又係乜嘢好日子呢？咪係淘寶囉，淘寶網喺嗰日舉行「雙12全民瘋搶」，佢哋公布嘅數字真係有啲「癲」，一日內竟然做咗43.8億元（人民幣‧下同）嘅生意，破晒紀錄，唔怪之嗰日絲絲班姊妹咁深閨，原來匿喺屋企淘寶，都唔出街shopping。
姊妹掃10億女裝產品
都話女人錢易賺啦，呢43億生意入面，10億係女裝產品，男裝一半都冇，只有4億，母嬰、家居、數碼產品、鞋類，分別有3.7億、5億、4.8億、3億元。阿里集團旗下嘅淘寶網，早前同小商戶搞得不愉快，呢次活動正好沖喜吓。
個活動係由十二日凌晨開始，絲絲老友話，其實佢哋一早已經將揀好嘅物品，擺入購物車入面，等到零時一開始就結算付款，實行鬥快搶好嘢。
淘寶網嘅官方數據顯示，零時之後70秒，50瓶飛天茅台賣晒；一分鐘，300個倩碧黃油賣完；五分鐘，7個LV包包畀人搶晒；八分鐘，200根金條都冇埋。
見到呢堆咁癲嘅數字，最閉翳嘅係要租舖賣嘢嘅零售商，整多幾次呢啲「全民瘋搶」，容乜易虛耗晒啲購買力o架。往年一般要到元旦以後，辦年貨至會逐漸升溫，今年嘅春節同元旦距離唔夠一個月，好多消費者不得不提前安排採購，時間有限，惟有一次過上網「淘」啦！