絲絲講場：中移租網推3G為4G鋪路
電訊界流傳中移（00941）旗下中移香港（即前稱Peoples），準備推4G LTE服務。中移香港尋日又有動作，透過租用對手3G網絡（即行內所叫嘅「MVNO」），先殺入本港3G市場，變相將本身嘅2.5G服務升呢！
中移香港嘅業務策略向來都係實幹低調，今次推3G亦唔例外，公司只係透過新聞稿公布推出服務，究竟佢哋向邊一家公司租用3G網絡，中移當然係守口如瓶啦，但絲絲八卦所知，有關網絡容量據講係由CSL所提供。
無限數據有限制？
至於收費，以12個月合約優惠價計，中移香港3G Plan就分為88蚊、148蚊同218蚊三款，數據用量分別為200MB、400MB同有條件無限用量，即係話收費同其他3G收費唔算差太多，但絲絲留意到，中移香港話到明，無限數據每月最高上限為5GB、服務只可用屏幕6吋以下嘅手機，平板同手提電腦嘅應用及BT下載一律免問！