絲絲講場：永恒國際改名 拓「一條龍」銷售
絲絲尋日行過金鐘廣場，見到本港老牌珠寶店「俊文寶石」突然「落晒閘」，入面仲擺滿咗櫈，一心走入去八卦吓。原來係永恒國際（08351）早前收購咗俊文寶石後，尋日正式將公司改咗做「俊文寶石」。
重整業務 陳文輝呻忙
其實永恒國際收購咗俊文寶石後，可能因為打算重組業務組合，發展「一條龍」銷售模式，放棄咗盤批發生意，仲搞到今年九月底止嘅業績「見紅」添。
佢哋老細陳文輝都同絲絲「呻」話，近日忙住要重整業務，休息時間都唔夠。好彩就係，佢哋十一月嘅同店銷售增長，都達兩成，正處於不俗嘅上升軌，股民啖氣都可能順啲。
其實中國人喺唔順嘅時候，都幾鍾意改名轉運。絲絲就覺得，永恒國際改名都算「一箭雙鵰」，一來更能反映公司本身嘅業務；二來又叫做應吓中國習俗轉吓運，絲絲都希望阿祖（陳文輝之洋名）盤生意愈來愈好啦。