內地一系列調控對付過熱樓市，呢排成效開始顯著，好多樓盤都有減價，不過可能愈減價，就愈係無人夠膽買，為咗增加銷售，絲絲早幾日就見有內地發展商組團喺網上賣房，打住「將定價權交給購房者」嘅旗號，以0蚊底價拍賣，聽落去好似好吸引，不過有好多內地網民就唔多buy，覺得呢招可能係發展商精心籌劃嘅「宮心計」，發展商可能會請人參加競拍，趁機炒高樓價。
十幾個內地發展商，一齊拎出成百個單位畀人由0蚊開始拍賣。網民意見排山倒海，佢哋話對發展商嚟講，呢場係穩賺嘅買賣，如果樓價比市價低，無疑可做到聚集人氣嘅廣告效益，仲得到好口碑。如果一旦樓價比市價高，開發商就會話呢個係市場定價，暗示樓價係無得跌。
有網民仲話，「呢一場出色嘅策劃，就好似宮心計，步步驚心！」，甚至有人懷疑，發展商可能會請人參加拍賣，趁機炒高房價。不過有彈都有讚嘅，有人認為網上買樓係一種大膽嘅嘗試，相信樓價應可反映買樓人士嘅心理價位。最終買樓人士受唔受落，就要睇下賣成點喇！
余絲韻