絲絲講場：渣打大手掌為健兒打氣
一年一度嘅渣打馬拉松將會喺出年二月舉行。尋日渣打香港就為咗呢項體壇盛事搞咗個造勢大會。為咗配合今年「Give Me ５」嘅主題，渣打今年會動員超過四千八百名中小學生，設計超過一千四百隻大手掌，宣傳馬拉松精神嘅同時，亦傳達傷健共融嘅訊息。
近八成中小學參與
身兼「馬拉松101教育計劃」大使嘅渣打香港個人銀行業務營運總監黎馮佩齡就話，呢個教育計劃由○六年推出以嚟，廣受學界歡迎，到今年已有七成八中小學參與，喺學界大型課外活動中屬非常高嘅參與率。對於今年動員咁多中小學生設計大手掌為馬拉松選手打氣，佢話係寓意互相扶持同傷健共融，的確別具心思。
設計作品有超過一千四百件咁多，渣打話會揀啲精選作品喺比賽當日派發畀在場人士，到時跑道嘅四周應該會有好多色彩繽紛嘅打氣手掌，為一眾健兒打打氣添！
余絲韻