內地中產消費力有幾強勁，唔使絲絲介紹，啱啱喺香港預託證券上市嘅Coach（06388），同其他名牌一樣，都話要加快拓展內地市場，而最快就係靠網購，睇吓阿里巴巴集團旗下嘅淘寶網做得咁成功就知啦。不過內地網上世界仍然充斥住唔少A貨，令到啲知名品牌相當頭痛。
為咗保持到品牌嘅價值，Coach尋日就同淘寶網簽署咗合作備忘錄，希望阻止Coach嘅假貨喺淘寶網上售賣，而且呢個仲係Coach第一次同內地電子商務平台合作，決心一齊打假貨，以保障消費者權益。
不經不覺，Coach已經進入內地十年，打響咗名堂，但隨之而來嘅自然就係有A貨出現，損害其品牌價值。事實上，Coach一直對假貨「零容忍」，所以喺○○年亦都發起咗知識產權項目，同政府及其他品牌一齊打擊造假嘅行為。
余絲韻