近年香港嘅閱讀風氣高咗，多得一班志同道合嘅人努力，甚至喺商界都經常宣揚閱讀嘅好處，好似新地（00016）執行董事兼首席財務總監陳國威，同埋出身名門望族嘅洪承禧，就大談與書結緣嘅故事。
何東外孫、曾任九倉、會德豐大班超過卅年嘅洪承禧，經過16個月嘅牢獄之災後，喺新地出嘅刊物《讀書好》中，大爆點樣善用牢獄嘅時間多讀書。
獄中規定一星期只准帶六本書，佢睇書睇得好快，點算呢？好彩囡囡聰明，用一本厚書收埋四本書，以瞞過職員嘅檢查，就係咁，喺獄中睇咗160本書。洪承禧話自己喺獄中閱讀及寫作，令佢重新搵番自己，亦回憶起好多美好嘅事物，甚至投入到有啲忘我。
佢推出喺獄中親手寫嘅自傳，仲話寫作係佢「牢獄苦難」中嘅救贖，甚至治療咗佢，令自己搵番快樂，又搵番信念添。
會計師出身嘅陳國威，亦係一位酷愛閱讀嘅「大忙人」。絲絲知道，原來陳國威細個反而唔鍾意讀書，一早出嚟社會謀生，反而令佢對知識增添咗一份渴求。佢仲認為，知識不但要獲取，仲要分享，因為我哋依家擁有嘅知識，好多都來自前人，而我哋只係「託管」，要將佢交給下一代，先可以「薪火相傳」。
余絲韻