市場熱線：創維下跌風險有限

上周三晚六大央行救市殺淡友一個措手不及，今次輪到好友要捱，美股期指尋日亞洲時段承接前晚弱勢，恒指喺10點之後正式告別萬九，下晝一開波係全日最低位，但尾市回升番百幾點，收市跌237點報18,942點，期指轉高水82點。

炒股猶如賭大細

今次標普呢招都夠晒絕，拖埋兩大強國落水，仲講明法蘭西有機會連降兩級添，等你EFSF發債或要捱貴息。但所謂「趕狗入窮巷」，愈來愈多人認為歐洲最終要印銀紙一了百了。諷刺地，歐債危機未有徹底解決迹象，惟今次環球金融風暴的起點美國，經濟似已逐漸走出谷底，上周公布的十一月份失業率數據，由十月的9%回落至8.6%，道指今年累積升幅4.4%，遠遠跑贏累積下跌15.3%的歐洲股市。美元也相對強勢，美匯指數由十月中的75水平樓下，逐步攀升至79水平，有勢挑戰下半年的79.8雙頂阻力，假如以一班學生去形容歐美多國，雖然美國的財政操行只係攞到C，但市場認為對比攞D的歐洲，美國已經算係乖學生。

依家炒股的確好似賭大細，但古勝相信港股短期可以頂得住，尋日得475億元成交只係乾跌，要挾上挾落都唔係太難。

思捷（00330）大跌超過一成，隻股仲chok過二三線股，而內房股呢排亦係坐過山車，中國海外（00688）升咗咁多有回吐相當正常，但呢排內房股冇乜好消息，低吸仲可以博大霧，高追就咪搞嘞。

滬綜指跌近上次低位之後有技術反彈，但收市仍跌7點，唔止A股弱雞，人仔竟然連續5日跌停板，十月外匯佔款餘額8年來首次下降，好有走資疑雲。都係香港人醒目，呢兩個月人仔存款下降已反映貶值預期。

假如人仔貶值，對出口股同勞動密集行業最得益，裕元（00551）尋日升近2%，紡織股亦表現唔差；但富士康（02038）、比亞迪電子（00285）同瑞聲（02018）呢幾隻手機股仍要跌，聽講蘋果產品供應商到過年都要趕工，所以低位可以一吼。飛機股就最受人仔貶值影響，東航（00670）跌咗5%。

祖國畀人仔升值係刺激內需招數，人行雖然日日開嘅中間價都係6.33X，但好快就跌到下限。不過，祖國靠內需已係唯一出路，人仔貶值將令外國貨貴咗，對部分本地牌子有利。創維數碼（00751）派完半年成績表之後，古勝已建議喺3蚊樓下吸納，雖然到家陣未算有乜肉食，但仍然值得睇多兩眼。

3D電視刺激銷量

創維半年成績表令人失望，比起舊年下半年度未有繼續改進，公司管理層對出年3D電視好有信心，而中央亦會陸續推出3D頻道，到時3D電視可以提升公司毛利率。不過，乜嘢電視都係假，最緊要節目好睇，阿爺又話限娛（樂節目）又話限廣（告），未來可能得番新聞、文藝節目或者唱紅歌，逼你熄電視。

但無論係點，電視已係必需品，擺架3D大電視喺屋企做擺設都威啲，未來同胞會陸續換機，創維生意起碼可以維持，現價PE約6倍，息率有4厘幾，所以下跌風險有限。創維十月電視銷量按年升55%，就快會有十一月數據，應該亦會唔差，今年農曆新年過得早，所以會提早過旺季，短線有力反彈。

古勝