藝人呢排興生仔，陳慧琳（Kelly，圖）出咗名想生多個，佢已經得償所願佗緊個Baby，唔知係咪想賺多啲奶粉錢，佢已經應承咗做青蛙王子（01259）全新代言人。
為咗佗B，據聞Kelly推咗好多job，今次肯做代言人，可能同產品性質有關。據講佢只會拍平面廣告做宣傳。依家嘅小朋友好矜貴，永遠都係父母心目中嘅金叵蘿，以前就話賺女人錢易賺，其實賺阿媽嘅錢仲好賺，皆因佢哋事事緊張，畀仔女用嘅、食嘅、玩嘅，都要係安全兼質素上乘嘅產品。
青蛙王子喺香港上市咗幾個月，主要係做兒童護理產品，以前佢哋集中做中國二、三線城市，今年開始就做多啲一線城市。搵Kelly做代言人，就合晒合尺，佢會喺下個星期，親自出席發布會，分享育兒嘅樂趣，並暢談選購兒童護理產品嘅心得，既然拍咗平面廣告，到時都會分享吓拍攝廣告時嘅花絮片段，唔知會唔會有埋Kelly愛兒蝦餃仔呢。