除咗政府同央行之外，評級機構近年發揮嘅威力真係唔講得笑。標普前幾日藉住改變計法，十五間全球最大嘅銀行都要降級，滙控（00005）同阿仔恒生銀行（00011）一齊遭殃，但係渣打就「升呢」咁威水，難怪佢哋嘅窩輪部門，即刻喺網站掛起banner，一於晒命！佢哋咁高興，係因為評級嘅高低，對銷售衍生產品好重要，評級愈高代表產品愈安全，而ELN動不動就過百萬投資，更加需要幫襯高評級嘅發行商。
渣打嘅信貸評級由原先嘅「A+」升呢到「AA-」，認股證銷售董事翁世權（Simon）話，評級上升對生意有好大幫助，並預期今個月佢哋會較上月出多五成輪，當中以藍籌股窩輪為主，進軍牛熊證市場更係明年嘅重頭戲呢。
今次畀標普降級嘅十五家銀行，唔少係做埋輪商，好似高盛、花旗、作為美林擔保人嘅美銀均被降至A-，僅僅符合上市規則要求嘅最低投資級別。美銀早前已被穆迪下調至Baa1級，已經低過上市規則要求，假如標普日後再降級，美林會即時喪失發行窩輪及牛熊證嘅資格。
余絲韻