呢排日日開會，都咪話做到唔索氣！不過，車出車入之間，見到女士們濃妝艷抹，化妝品呢行都真係值得研究一下。不過，要搵一間好嘅化妝品公司，又真係要花下腦力！
莎莎國際（00178）主要業務係化妝品牌產品嘅零售同批發，業務範圍包括香港、澳門、中國、台灣、新加坡以及馬來西亞等地。主要收入來源，來自香港以及澳門地區，而且喺港澳地區行銷化妝品一直佔據住領導地位。
集團不斷創新，針對更廣泛嘅顧客群引入更多新產品，利用協同效應，亦成功推動咗專有品牌產品同獨家產品嘅銷量上升。同時亦不斷實施現代營銷管理：推出全新店舖設計、不斷提升顧客購物體驗。大家如果實地考察，就會發覺自從集團改咗店舖設計後，大家瀏覽貨品時更加方便。另外，莎莎加添嘅互動元素，可節省大家時間，同時能夠令顧客更易揀到心水產品；方便咗顧客，顧客就自然更加鍾意幫襯啦，大家話係咪？
可能內地同胞走晒嚟香港買化妝品，集團喺中國大陸方面嘅發展仍處發展階段。集團一一/一二年度的中期業績，內地業務仍然錄得虧損1,970萬元，雖然營業額升咗80%，但仍處虧損階段；針對呢個問題，集團繼續利用港澳經驗，不斷將優秀嘅管理系統引入，相信未來可續見改善。
香港大學電子金融服務榮譽助理教授徐燦傑