絲絲講場：英倫物業基金來港吸金
投資前輩以前經常教絲絲「通脹到，梗係買磚頭」，又或買同房地產掛鈎嘅基金，原則都係要低買高賣。國際物業基金管理公司Cordea Savills嘅「倫敦高級住宅發展項目基金」，依家嚟咗香港搵投資者，睇怕都係睇中中國人鍾意磚頭嘅心態。
英國政府後海嘯期鼓勵「審慎借貸」，好多老牌發展商都「莫財」，Cordea Savills覷準機會，同啲發展商合作發展豪宅，仲打算「斟」埋散戶投資者玩。
該封閉式基金會專注發展Mayfair、Knightsbridge及Belgravia等老牌豪宅區，價值300萬至800萬英鎊嘅公寓及價值1,000萬英鎊以上嘅獨立屋。今次來港集資的規模達1.5億英鎊，入場費最少20萬英鎊。
四年料起碼升兩成
不過，倫敦啲樓價好似啱啱創新高，仲有無得升呀？Cordea Savills住宅物業收購部門主管狄博麟話，其實該基金選擇嘅豪宅區常處於供不應求狀態，其團隊預期有關物業未來4年嘅升幅最少達20至25%。而且嗰區勁受歐洲、俄羅斯、亞洲等富豪嘅青睞，但反而全球最鍾意「炒樓」嘅中國投資者，就只佔約1%，所以佢哋可以話係信心爆棚！